一個週末晚上我哋去咗一間水上餐廳晚飯，諗住享受一下、拍吓拖。餐台隨住水潮微微地盪著，我哋一齊披住餐廳提供嘅暖毯，分享彼此嘅體溫。日落黃昏配上淡黃燭光，此情此刻。
侍應奉上餐點，白酒煮藍青口，西冷肉漢堡。正當我哋準備拎起餐具，餐台因水流暗湧猛地搖晃，餐具叮噹一聲隨之跌落地上。我起身去問侍應生拎過新餐具，返嚟漢堡包嘅包已經不翼而飛，時隔不過一、兩分鐘。
我好驚訝咁望住阿伯，佢一臉無辜：「頭先有隻海鷗飛埋嚟擔走咗你塊包呀」。
我仍然接受唔到事實追問：「點解你唔趕佢走呀？」
佢覺得又攪笑又無奈：「你一轉身果秒佢就從天而降，秒速擔走咗啦～」
可能你會懷疑，明明個漢堡有把刀咭住，隻雀又點擔得走呢？我哋都太年輕啦⋯⋯ 佢堂堂一隻海鷗，人類都睇到嘅嘢，海鷗哥佢又點會唔知呢？佢係擔走咗包底果塊呀！冇錯，一條菜一塊肉連一條洋蔥都不多不少原封不動！就係好精準地將最底下果塊包完完整整咁擔走咗呀。
呢一刻我深深明白咩叫弱肉強食，人類係會輸俾大自然呢句話。原來海鷗都已經進化到咁聰明啦⋯⋯
Search